El Departamento de Obras Publica y Carreteras, o DPWH, ya anuncia el complecion del construccion de un edeficio de escuela na provincia del Zamboanga del Sur.
Asegun con el DPWH-Zamboanga Peninsula, con el edeficio compuesto de un piso con dos cuartos ya construi na escuela de elementaria na Barangay Nilo, Tigbao, Zamboanga del Sur.
El DPWH-Zamboanga Peninsula, nohay mas habla si cuanto el cantidad del proyecto de edeficio de escuela.
“Previamente, el mga estdudiantes ta man problema sobre de dalasucan na cuarto, sanitacion deficiente, y ambiente propenso de inundaciones. Para solve con este asunto, el proyecto ta inclui un escusao, parilla de ventana para el seguridad y un terraplen para mejora el elevacion estabilidad del lugar,” el DPWH-Zamboanga Peninsula ya habla na un anuncio.
Asegun con el DPWH-Zamboanga Peninsula, el nuevo facilidad ta proporciona mas segurao y mas conducivo espacio de estudio para del mga estudiantes y maestro y maestro, mejorando el experiencia educativa en general.
Asegun con el DPWH, el iniciativa ta refleja el dedication del govierno para mejora infraestructura educativo y asegurando buen condiciones de estudio para del mga jovenes na Zamboanga del Sur.
Con el proyecto ya implementa el oficina na segundo distrito de ingenieria del DPWH na na Guipos, Zamboanga del Sur. (B. Garcia)