El comunidades local ta beneficia ahora con el construccion y trabajo de mejoramiento que ya hace el Departamento de Obras Publicas y Carreteras o DPWH na ciudad de Dapitan y municipalidad del Liloy, Zamboanga del Norte.
El oficina de enginieria na primer distrito del DPWH na Zamboanga del Norte ya completa con el cementada del un-kilometro porcion del camino de diversion de Sicayab-Bucana-puerto de Dapitan na ciudad de Dapitan.
Asegun con Enginiera Cayamombao Dia, el director regional del DPWH, con el buen condicion del camino, el mga residentes del Sicayab y Bucana conectao ya ahora con el mga sercanos comunidades y tambien con el servicio basico del gobierno y mga establisimiento.
El trabajo sobre el P50 millon proyecto ta inclui el hombro del camino y proteccion de abajada con instolacion de barandilla metalicas y reflectorizado marka na cemento como elementos de seguridad.
Mientras tanto, el oficina del terser distrito del DPWH na Zamboanga del Norte ya completa el construccion del 410-metros cementao camino acceso que ta conecta con el Barangay El Paraiso y Barangay Compra na municipalidad de Liloy.
El construjido camino ta dale ahora mas conveniente acceso na servicio esencial y establisimiento, y reduci el hora del viaje desde 15 para 20 minutos, ayudando con el mga local siembrador de goma y coco na transportada del de ila productos para na sercanos mercado y comunidades.
El proyecto de acceso camino que ya costa P9.8 millon ya hace por media del programa de Roads Leveraging Linkages for Industry and Trade Infrastructure (ROLL-IT) en convergencia con el Departamento del Negocio y Industria. (B. Garcia)