El Departamento de Obras Publicas y Carreteras, o DPWH, exitosamente ya completa el implementacion del P10 millones proyecto de sistema de agua solar na uno del mga barangay na ciudad de Zamboanga.
Asegun con el DPWH-Zamboanga Peninsula, el proyecto ya implementa na Barangay Lumbangan, 8.85 kilometros el distancia para na pueblo del ciudad de Zamboanga.
Asegun con el DPWH, el proyecto tiene el anchor de 120 metros cuadrado y caracteristicas de 4,000 metro cubicos de tanke de agua dedicao para agua potable, otro 4,000 metro cubicos de tanke para el uso de multiproposito.
Ademas, el facilidad ta inclui central electrica equipao de baterias y sistema de control para el eficiente operacion.
“El sistema de energia solar hinde lang ta proporciona sostenible acceso para na limpio agua, pero ta suporta tambien na conservacion de medio ambiente, haciendo un significativo paso pa adelante para del desarollo del comunidad,” el DENR-Zamboanga Peninsula ya habla na un anuncio.
Asegun con el DPWH-Zamboanga Peninsula, este proyecto ta descata el inquebrantable dedicacion del oficina de ingenieria del distrito para mejora el salud publica y mejorando en general el calidad del vida del mga residentes del Barangay Lumbangan. (B. Garcia)