Maga authoridad ya confisca mas de dos milyones de pesos valor de contrabando del Huwebes aga alla na municipio de Jolo, Sulu.
Asegun con Coronel Richard Verceles, el operations chief del Area Police Command-Western Mindanao, cay con el maga contranbado, compuesto de siento ochenta cahon de cigarillo, ya confisca maga alas sinco y media del tarde alla na Barangay Walled City, Jolo, Sulu.
Asegun con Verceles cay el maga pulis ta man patrulya cuando ya columbra sila un camada de cahon de cigarillo.
Pero asegun con Verceles cay nohay quien ya aparece como duenyo del maga cigarillo cuando ya ase investigacion maga police na vicinidad donde ya encontra maga pulis con el camada del cahon de cigarillo.
Con el maga cigarillo ya pone bajo del custodiya del pulisya na Jolo y ay entrega con este na buro de aduana para el propio disposision. (Bong Garcia, Jr., photo courtesy of Area Police Command- Western Mindanao)