El Departamento de Medio Ambientes y Recursos Naturales o DENR ya pone bajo curada con el un Asian Palm Civet o mas conocido como el Milu na Wildlife Rescue Center para el propio atencion y evaluacion.
Base na inicial evaluacion, el Milu tiene el pesades de 0.87 kilo y medicion de 25.5 pulgada desde cabesa hasta na rabo, asegun con el DENR del Lunes.
Asegun con el oficina regional del DENR, con el Milu ya entrega el Maritime Police Station del otro semana na Oficina Provincial de Medio Ambientes y Rescursos Natural del Zamboanga del Sur na ciuad de Pagadian.
Asegun con Police Master Sergeant Junrey Regencia del Maritime Police Station, ya encontra sila con el Milu na un abandonao casa de nipa mientras ta conduci sila patrulla na municipio de San Pablo, Zamboanga del Sur.
Asegun con el DENR, el Milu hay esta na Wildlife Rescue Center na Barangay Lacupayan, Tigbao, Zamboanga del Sur hasta hay llega el tiempo puede ya conele debolbe na su natural habitat. (B. Garcia)