El mga personajes del Community Environment and Natural Resources Office (CENRO)-Siocon ya larga na forestal del Zamboanga del Norte un chonggo conosido como el “Philippine Long-Tailed Macaque”.
Si Rosevirico Tan, el portavoz del oficina rehyonal del Department of Environment and Natural Resources (DENR) ya habla cay con el chonggo ya larga na forestal del Barangay Tan-awan, Baliguian, Zamboanga del Norte.
Asegun con Tan cay con el chonggo ya salva na Barangay Tagaytay na municipio del Siocon, Zamboanga del Norte del Agosto 10.
Si Tan ya habla cay hombre el chonggo con el pesades de sinco kilos base na evaluacion ya ase mga personajes del Protected Area Management Office.
Asegun con Tan cay el chonggo nohay irida o rastro de infeccion, y na buen salud cuado ya salva con este.
Si Tan ya habla cay el chonggo incluwido ya na mga vulnerable animal base na lista del mga amenasao clase de animal del International Union for Conservation of Nature (IUCN).
Myentras tanto, si Tan ta ase acorda con el publico cay prohibido cuwida, pajaria, y colecta mga animal del monte sin el propio permiso desde’l DENR. (B. Garcia, photo courtesy of DENR-9)