El mga personajes del Departamento de Medio Ambiente y Recursos Naturales, o DENR, ya larga un Green Sea Turtle para na su habitat natural na provincia del Zamboanga del Norte, asegun con el DENR del Sabado.
El oficina regional del DENR ya habla, con el turtuga ya larga del otro semana na un resort na Barangay Guimputlan, ciudad de Dapitan, Zamboanga del Norte.
Asegun con el DENR, con el turtuga ya encontra si Jerry Eguia na corral de fescao na Barangay Panganoran, Sibutad, Zamboanga del Norte.
El DENR ya habla, si Eguia ya entrega con el turtuga con Marlon Cabilin, un oficial de proteccion forestal, quien ya informa na Oficina Comunitaria de Medio Ambiente y Recursos Naturales del Piñan, o CENRO-Piñan, mientras ya recuji le con el turtuga na su residencia na Barangay Linabo, ciudad de Dapitan.
Un grupo del CENRO-Piñan ya evalua con el turtga como na buen condicion y en forma para larga na su habitat natural.
El DENR ya habla, el turtuga tiene el medicion de 43 centimetros el largor del carapacho y 41 centimetros de ancho y aproximadamente 10 kilos el pesades.
El DENR ya habla, el Green Sea Turtle es clasificado en peligro especies bajo el Orden Administrativa del Departamento 2019-0, el lista nacional actualizada del en peligro fauna Filipina y de ila categorias.
El DENR ta continua anima con el publico para reporta algun avistamientos y encuentros con vida silvestre para el inmidietamente y propio accion. (B. Garcia)