El mga autoridad ya aresta tres personas na un operacion de aplicacion de ley que ya resulta na desmantelada de un cuarto de droga na provincia del Zamboanga Sibugay, asegun con el Philippine Drug Enforcement Agency (PDEA) del Sabado.
El oficina regional del PDEA ya identifica con el mga arestao suspechao como canda Maximo Deregla, 46 años el edad, un soldador; Mark Cuansing, 25, un recogidor de goma; y, si Johlex Tamanan, 20, otro un recogidor de goma.
Asegun con el PDEA, con el tres suspechao ya aresta na un operacion de aplicacion de ley por medio na implementacion de un orden de registro que ya resulta na desmantelada de un cuarto de droga mga alas 10:25 del Viernes aga na Purok 2, Barangay Mountain View, Imelda, Zamboanga Sibugay.
Asegun con el PDEA, ya confisca na desmantelao cuarto de droga 12 gramos de suspechao shabu que tiene el valor de P81,600 y mga varias parafernales de droga ilegal.
Asegun con el PDEA, ya detene con el mga arestao suspechao en preparacion para el plantada del caso contra canila por violacion del Secciones 6, 7, 11, y 12 del Ley Intergral de Drogas Peligrosas de 2002.
El operacion de aplicacion de ley ya conduci el oficina regional del PDEA con el suporta del policia na municipio del Imelda, Zamboanga Sibugay.
El PDEA, en coordinacion con el otro agencias de aplicacion de ley, ta continua el esfuerzos incansables para combate actividades de droga ilegal y desmantela redes de drogas operante na Zamboanga Sibugay. (B. Garcia)