Zamboanga: CRSAFP ya instola nuevo comandante na 4CRG

0
6
(Photo courtesy of 4CRG)

El Civil Relations Service del Fuerza Armada del Pilipinas o CRSAFP ya inicia cambio na liderato del 4th Civil Relations Group (4CRG) base na Campo Navarro aqui na ciudad de Zamboanga, asegun con el 4CRG del Miercoles.

El nuevo comandante del 4CRG amo si Major Orlando Ayllon con quien ya instola na puesto del Martes por medio de un simple ceremonia na oficina del 4CRG.

Si Ayllon ya releva con Major Andrew Linao, quien ay bira na servicio de campo del Philippine Army despues de servi’r como comandante del 4CRG por tres años.

Si Ayllon, antes del su nuevo designacion, ya servi le como de diputado comandante del 7CRG base na Campo General Emilio Aguinaldo na ciudad de Quezon.

Asegun con el 4CRG, si Ayllon ay servi tamen como el interino official de informacion publica del Western Mindanao Command (Westmincom) igual como el cosa ya servi si Linao.

Si Linao ya expresa su sincero apreciacion y gratitud con el mga gente quien ya ayuda conele compli su obligacion durante su termino.

Na su mensaje, si Ayllon ya jura compli su obligacion con maxima determinacion y dedicacion como el nuevo comandante del 4CRG y interino official de informacion publica del Westmincom.

Con cel ceremonia de cambio del mando del 4CRG ya encabesa si Major General Ramon Zagala, el comandante de CRSAFP.

Si Zagala ya felicita con Linao por su meritorioso servicio y acomplisimiento durante to termino como el comandante del 4CRG y ya dale tamen le su confiansa como Ayllon cay puede le ase igual o mas pa con el acomplisimientos del su predecessor.

Con el ceremonia del cambio del mando na 4CRG ya atende mga oficiales y personajes del mencionao mando y del Westmincom. (B. Garcia)

Leave a Reply