Un siembrador el irido despues que ya tajia conele su rival por causa de amor y selos na costa oeste de este ciudad, asegun con el policia local del Viernes.
Asegun con el policia local con el irido siembrador ya conose como si Ricky Rosal, 43 años el edad con quien alegaomente ya tajia si Angelito Montañes, 49, un siembrador tamen y rival del victima.
Asegun con el policia el incidente ya ocuri mga alas 7:49 del Jueves denoche na Sitio Pole Diutay, Barangay La Paz na costa oeste de este ciudad.
Base na investigacion, apuera na su casa si Rosal cuando ya aparece el suspechao, si Montañes, y ya tajia conele usando sangut y ya lansia pa de pana.
Asegun con el policia, si Rosal ya puede ase balus por medio de tajiar con Montañes usando bolo maskin irido ya el victima.
Con Rosal, quien ya iri na izquierda pies y cabesa, ya lleva na Zamboanga City Medical Center mientras con Montañes, quien ya iri na ezquierda y derecha hombro, ya lleva na Labuan General Hospital para el curada medical.
El mga pulis ya anda na Labuan General Hospital y ya aresta con Montañes.
Asegun con el policia, selos el motivo del incidente siendo el antes “live-in partner” de Montañes amo ahora el live-in partner de Rosal.
Antes del incidente, el dos man rival ya aregla ya de ila problema que tiene que ase na amor na barangay hall del La Paz. (B. Garcia)