El Charlie Company del 100th Infantry Battalion (100IB) ya inicia cambio na designacion del sargento primero del compania base na Barangay Pasil, Indanan, Sulu, asegun con el militar del Viernes.
Asegun con el 100IB, con Technical Sergeant Noel Cubillan ya designa como el nuevo sargento primero del Charlie Company y ya releva le con Staff Sergeant Jackson Ginez.
El ceremonia del cambio de sargento primero ya conduci del otro semana na cuartel del Charlie Company na Barangay Pasil, Indanan.
Si First Lieutenant Enrey Crisostomo Rafael, el comandante del Charlie Company, ya encabesa con el ceremonia del cambio sargento primero.
Durante el ceremonia, si Ginez ya expresa si gratitud por el inquebrantable suporta del mga tropas y orgullo con el de ila colectivo acomplicimiento.
Si Ginez ya descata el sentido fuerte de unidad y dedicacion que ya cultiva bajo su liderato, ofreciento su palabras aliento de despedida para de ila continuo servicio.
Si Cubilla ya manifesta su disposicion asumi el responsibilidades del su nuevo designation.
Na su mensaje, si Cubilla ya promete garantiza el crecimiento continuo y resiliencia del mga personajes del compania.
Mientras tanto, si Rafael ya comenda con Ginez por su dedicao servicio y desea exito na su futuro designacion.
Ya anima si Rafael con Cubillan para abraza su nuevo papel con corage y determinacion, expresando comfiansa na su habilidad encabesa efectivamente con el compania. (B. Garcia)