Ya rendi el ultimo y restante ocho miembros del grupo Abu Sayyaf, o ASG, na provincia finalmente haciendo con el provincia de Basilan librao desde’l ASG, asegun con el militar del Viernes.
Si Brigadier General Alvin Luzon, el comandante del 101st Infantry Brigade, ya habla el ultimo y restante ocho miembros del ASG ya rendi del Jueves na Barangay Guiong, Sumisip, Basilan.
Si Luzon ya identifica con el mga rendidores ASG como canda Tawakkal Bayali, el lider del grupo, Abu Bayali, Julhari Bayali, Hasib Tualaran, Yusup Bayali, Marjan Bayali, Makrin Bayali y si Apong Upaman.
“Ya rendi y ya bira sila na poder del ley y sociedad dominante cay ta desea sila vivi normal vida hunto con el de ila familiares,” si Luzon ya habla.
El mga rendidores ASG ya entrega sinco armas de fuego de alta calibre que ta consisti de un M203 grenade launcher, tres rifles M16, un rifle Carbine y diferentes clase de bala.
Asegun con Luzon, el rendida del grupo de Tawakkal Bayali amo el de todo buen pascua para con mga Basileños—un significante paso para na duradera paz que hay dale camino na mas progres y desarollo del Basilan.
El rendida del ultimo y restante ocho miembros de grupo Abu Sayyaf ya facilita por medio del esfuerzos incansables del militar, gobierno municipal del Sumisip, y liderato del Moro Islamic Liberation Front (MILF) na provincia del Basilan. (B. Garcia)