Nuevo ya ahora el diputado comandante del “Coast Guard District Southwestern Mindanao (CGDSWM)” base aqui na ciudad de Zamboanga.
Ele si Commander Carlos Dela Rosa con quien ya instola si Commodore Marco Antonio Gines, el comandante del CGDSWM, durante un ceremonya del Huwebes na Estacion de Fuersa Naval Romulo Espaldon na Barangay Calarian aqui na ciudad de Zamboanga.
Si Dela Rosa ya releva con Capitan Geoffrey Gervo con quien ya designa na otro posicion.
Si Gervo ya recivi el honor de “Coast Guard Outstanding Achievement Medal” y “Ribbon” como un reconosimiento por el su buen servicio, dedicacion y contribucion excepcional na organisasion.
Si Dela Rosa ya promete mantene el alto estado de profesionalismo, guarda con el interes maritima y suporta con el mandato del guardia costal del Pilipinas.
Si Gines ya expresa su confiansa con Dela Rosa y ya extende su sincero apreciacion con Gervo por su dedicacion na servicio y contribucion excepcional con el CGDSWM. (B. Garcia, photo courtesy of CGDSWM)