El gobierno del ciudad hinde hay pone bajo’l estado de calamidad con el Zamboanga siguiendo el ulan torrencial del otro semana que ya causa avenida na varias barangay resultando na desplazada del mga familias, perdicion de vida y destroso de propiedad.
Asegun con Dr. Elmeir Apolinarion, el jefe del City Disaster Risk Reduction and Management Office (CDRRMO), el gobierno del ciudad ampliamente ya prepara mga necesita recursos para enfrenta con el situacion.
“Setenta por ciento del de aton fondo ya aloca intendido para con este problema. Na custion de infrastractura, disposicion de comida y alivio, completo ya. Porque pa necesita declara estado de calamidad?” ya habla si Apolinario.
Asegun con Apolinario, el su oficina ya principia compra cosas de alivio, equipo y otro recursos desde el año 2023 pa.
Si Apolinario ya habla, el mga respondedores y voluntarios ya recivi ya tamen suficiente entreno en preparacion para el fenomeno del La Niña.
Asegun con Apolinario, el oficina de enginieria ya conduci ya tamen el actividades de desiltation mientras el oficina de salud del ciudad ya solicita ya para el compre del mga medicina, patrcilarmente 70,000 tableta de doxycycline para cura leptospirosis.
Todo ya preparao poreso nohay mas necesidad pone bajo el estado de calamidad con el ciudad de Zamboanga, asegun con Apolinario. (B. Garcia)