El mga autoridad ya confisca mga armas de fuego de alta calibre na un operacion contra trafico de armas de fuego que ya resulta na muerte del un oficial de barangay despues del un tirahan na provincia del Lanao del Sur, asegun con el policia del Lunes.
El Criminal Investigation and Detection Group na Bangsamoro Autonomous Region in Muslim Mindanao (CIDG-BARMM), ya identifica con el muerto official del barrio como si Billy Jack Ogca, el barangay capitan del Poblacion, Balabagan, Lanao del Sur.
Asegun con Police Lieutenant Colonel Ariel Huesca, el jefe del CIDG-BARMM, ya iri si Ogca cuando ele y su mga compañeros ya man tirahan pati mga operativas del CIDG durante el operacion de compra busto mga ala una del Sabado tarde na un estacion de gasolina na Barangay Upper Itil, Balabagan, Lanao del Sur.
Si Huesca ya habla, ya rebenta el resullo de Ogca mientra bajo le na curada medical na un hospital.
Asegun con Huesca, el sinco compañeros de Ogca que ta inclui un mujer, ya puede escapa.
Si Huesca ya habla, ya socede el tirahan cuando el mga suspechao ya tira de ila pusil despues que ya gole sila cay ta ase sila transaccion na vendida de armas de fuego con mga pulis.
Asegun con Huesca, ya recubri na posesion de Ogca un calibre .45 pistola con mga bala.
Si Huesca ya habla, ya puede tamen recubri na lugar del tirahan un vehiculo, tres rifles M-16, un rifle M-14, un calibre .45 pistola, mga bala de diferentes calibre, tarjetas de identificacion, y un balutan de marka boodle money.
Asegun con Huesca, ya conduci el operacion contra trafico de armas de fuego con el suporta del Lanao del Sur Police Provincial Office (LDSPPO) que ta encabesa si Police Colonel Robert Daculan. (B. Garcia)