El Ministry of Health na Bangsamoro Autonomous Region in Muslim Mindanao (MOH-BARMM) ya firma P5.5 millon colaboracion con cuatro hospital ta proporciona ayuda medical con mga indigente pacientes na region autonomo, asegun con el MOH-BARMM del Sabado.
El colaboracion ya hace por medio de un memorando de acuerdo que ya firma el MOH-BARMM y cuatro hospital para proporciona continuando proceso de ayuda medical, que ta mengua el problema del mga elegibles pacientes.
Asegun con Dr. Kadil Sinolinding, el ministro del MOH, ya habla el mga pareja hospital ta inclui el Cotabato Sanitarium General Hospital (P1 millon), AppleOne Brokenshire Medical Cooperation (P2 millon), Midsayap Doctors Specialist Hospital (P1 millon), y Camp Siongco Station Hospital (P1.5 millon).
Ya expresa si Sinolinding su gratitud con el mga pareja hospital por el de ila dedicacion entregando equitativo y calidad servicio de salud.
Si Baby Norbaina Caludtiag, el jefe del programa de Malasakit, ya habla el programa hay enfoca na suportada con el mga indigente, y aquellos individual incapacitado financial, y ta esta apuera del region autonomo.
Si Caludtiag ya dale mira el importancia del dalida de ayuda apuera na BARMM, reconociendo cay hinde todo’l paciente puede acomoda na mga hospital na ciudad de Cotabato.
El MOH-BARMM ya promete para mas hay portalece con el ayuda medical con mga indigente y pacientes incapacitado financial na region autonomo. (B. Garcia)