El Ministry of the Interior and Local Government del Bangsamoro Autonomous Region in Muslim Mindanao (MILG-BARMM) ya aloca P30 millon fondo para construi nuevo edificio para del municipal hall del Mapun, un lejanos municipio del provincia del Tawi-Tawi.
Si MILG Minister Naguib Sinarimbo ya habla del Viernes cay si Suraida Muksin, el alcalde de Mapun, personalmente na viaja para na ciudad de Cotabato para recivi el cheke que ta representa media del total fondo para principia el proyecto.
Asegun con Sinarimbo, bien alegre el alcalde cuando ya recivi le el cheke cay finalmente ay realisa ya su sueño de tener nuevo municipal hall.
El existente municipal hall na Barangay Liyubud municipio del Mapun bien diutay y daan ya que ta puede lang acomoda media del numero de empleyado del govierno municipal.
Asegun con Sinarimbo, el Mapun possible amo el de todo lejos municipio del BARMM cay entra’y medio este del mar del Sulu y bien serca na Palawan y Sabah, Malaysia.
Conosido antes como el Cagayan de Tawi-Tawi, el Mapun tiene mas de 30,000 residentes base na cuentas de populacion del año 2020. (B. Garcia, photo courtesy of MILG-BARMM)