Pursigido ni Gob. Matthew Marcos Manotoc a mangitandudu iti pannakaipadur-as ti industria ti kawayan ditoy Ilocos Norte.
Inpakaammo ni Mr. Hashler Garalde, bamboo focal person ti Provincial Government of Ilocos Norte, a nupay mangrugi pay laeng a maiyestablisar ditoy probinsia ti “tissue culture” ti kawayan ket pinarugianen ti gobernador ti pannakitaripnongna kadagiti manamnama nga agbalin nga “investor” kas iti “Rizome Philippines”.
Segun ken Garalde, interesado ti nasao a kompania nga agpuunan para iti nadakamat nga industria.
Impalgakna a kalikagum pay dagitoy ti mangipasdek kadagiti pasilidad a pagaramidan ti nadumaduma a produkto manipud iti kawayan.
Imbatad ni Garalde a daytoy ti mangipasigurado ti nayun a pamastrekan dagiti kakailian.
Inbunannagna a nakasagana dagiti maseknan a gumatang kadagiti maaramid a produkto manipud iti kawayan ken aadda pay ti posibilidad a mailako dagitoy a produkto iti sabali a pagilian.
Mainaig iti daytoy, inlawlawagna a karaman pay dagiti “public areas” kadagiti lugar a nabisitan a mabalin a pakaipatakderan dagiti pasilidad.
Gapu iti daytoy, kunana a maisagsaganan ti “tenurial instrument” kadagiti nasao a lugar tapno maipalubos a mapatakderan dagitoy ti pasilidad para iti kawayan.
Kabayatanna, inpakaammo ni Garalde nga addan ti naaprobaran babaen iti Department of Labor and Employment (DOLE) para iti Sustainable Livelihood Program dagiti kakailian nga interesado a sumrek iti industria ti kawayan manipud iti ili a Nueva Era, siudad ti Laoag ken ti siudad ti Batac.
Inbunannagna a dagitoy ti pakpakauna a maipaayan ti tulong agsipud ta dagitoy dagiti gunglo a reshistrado iti DOLE ken iti Securities and Exchange Commission a pasado iti pagalagadan nga inyetnag ti DOLE.
Impalgakna a mangipaay ti DOLE ti agarupo lima gasut a ribu a pisos iti tunggal Local Government Unit para iti maipasdek a pasilidad ken dagiti mausar a kagamitan a mangpaalisto ken mangpapintas kadagiti aramiden dagiti maseknan a produkto manipud iti kawayan.
Innayonna nga iti agdama ket aaddan dagiti naiyestablisar a pasilidad idiay Brgy. Mabaleng ti siudad ti Batac, Brgy. Balatong ti siudad ti Laoag ken idiay Brgy. Ugis ti ili a Nueva Era. (Irene Ringor)
(Source: Provincial Government of Ilocos Norte – Communications & Media Office)