Un barangay tanod el ya muri mientras otro un persona el nohay pasa nada cuando na un colision frontal envuelto un motorciclo y un pick-up trak na costa este del ciudad de Zamboanga, asegun con el policia del Martes.
El policia ya identifica con el muerto barangay tanod como si Dambi Bakil, 42, un residente del Sitio Punzala, Barangay Bolong, ciudad de Zamboanga.
Asegun con el policia, el accidente vehicular ya ocuri mga alas 6:35 del Martes aga na Sitio Entrada, Barangay Bolong.
Base na investigacion, si Bakil ta maneja motorciclo estaba na Sitio Mala, Barangay Bolong, para na direccion del Sitio Punzalan na mismo barrio cuando ya man bangga conele el pick-up trak que ta maneja si Pukkoh Anding, quien ta viaja na opuesto direccion.
Asegun con el policia, si Bakil ya sufri mga grabe irida que ya causa su enseguidas muerte mientras nohay pasa nada con Anding, quien tiene el edad de 48.
El policia ya habla, con el resto de Bakil ya entrega na su familiares para el intierro de conformidad na tradicion de Muslim.
Si Anding ta esta bajo’l custodia del Zamboanga City Police Station 3 para el propio disposicion. (B. Garcia)