Otro ya tamen municipio na Sulu el ya pone bajo del declaracion cay librao ya desde’l influencia del grupo Abu Sayyaf.
Ese amo el municipio de Banguingui o mas conosido antes como el municipio del Tongkil.
Asegun con el 1102nd Infantry Brigade bajo el liderato de Brigadier General Giovanni Franza cay con el municipio de Banguingui ya declara librao desde’l influencia del Abu Sayyaf por medio de un resolucion ya aprova del otro semana.
Con el resolucion ya aprova el mga myembros del Banguingui Municipal Task Force to End Local Armed Conflict (MTF-ELAC) durante un junta na covered court del municipio na Barangy Luuk Poblacion.
El alcalde Whidzfar Sahidulla, quien ta encabesa con el Banguingui MTF-ELAC, ya expresa su gratitude con el mga vivientes, trabajante del govierno, sector de seguridad y diferente agencias activo ya participa para limpia con el Banguingui desde’s presencia del mga bandido Abu Sayyaf.
Asegun con Franza cay mucho el quien ta habla cay deficil obtene paz pero si hunto-hunto ay trabaja todo sector ay puede realiza de tener paz na provincial de Sulu. (B. Garcia, photo courtesy of 1102nd Infantry Brigade)