El suporta y ayuda ya dale el govierno local con el mga negociantes ta cuida puerco afectao na “African Swine Fever (ASF)” ya alcansa ya na cantidad de mas de P6.7 milyones.
El ayuda ta incluwi el compensacion de P2.77 milyones con el 274 negociantes ta cuida puerco afectao por causa del ASF; el dalida de P2.9 milyones ayuda financial con 585 ta cuida puerco bajo el programa de “Assistance to Individuals in Crisis Situation (AICS)” del Department of Social Welfare and Development (DSWD); y el implementacion del programa de “Tulong Panghanapbuhay sa Ating Disadvantaged/Displaced Workers” del Departamento de Obras y Empleyo que ya beneficia 298 negociantes ta cuida puero na cantidad de mas de P1 milyon.
Asegun con Dr. Mario Arriola, el hefe del Oficina del Veterinaryo del Ciudad, cay el ayuda financial aparte con el mga empaketao comida que ya distribuji por medio del City Social Welfare and Development Office con el mga afectao negoaciantes ta cuida puerco.
Myentrastanto, asegun con Arriola cay el numero del puerco ya muri por causa del ASF ta esta siempre na suma total de 4,655.
Tiene tamen el suma total de 1,112 cabesa de puerco el ya mata por causa na infeccion del ASF.
Total de 1,098 ta cuida puerco na 34 barrio el afectao por causa del ASF. (B. Garcia)