El mga autoridad ya aresta 11 gentes cuando exitosamente ya desmatela sila un cuarto de droga ilegal na un operacion de aplicacion de ley na provincia del Sulu, asegun con el Philippine Drug Enforcement Agency (PDEA) del Miercoles.
Si Gil Cesario Castro, el director del PDEA na Bangsamoro Autonomous Region in Muslim Mindanao (BARMM), ya identifica con el mga arestao 10 gentes como canda alias Alin, 45 años el edad, el mantenedor del cuarto del droga, y su mga clientes como canda aliases Son, Ben, Alex, Sam, Al, Moh, Fai, Dar, Al, y Lyka.
Asegun con Castro, con el mantenedor del desmatelao cuarto de droga ilegal y clientes ya aresta na un operacion de compra busto del Lunes na Barangay Kagay, Indanan, Sulu.
Asegun con Castro, ya confisca na desmantelao cuarto del droga ilegal 10 gramos de suspechao shabu que tiene el valor del P6,8000, aproximadamente sinco gramos de seco ojas de marijuana, dinero de compra busto, varias parafernales del droga, y un celpon.
Asegun con Castro, con el mga arestao suspechao ya detene na cuartel del policia na municipio de Indanan en preparacion para el plantada del caso contra canila por violacion del Ley Integral de Drogas Peligrosas de 2002.
Si Castro ya habla, con el desmantelada de cuarto de droga ilegal es el resulta na esfuerzos del mga agentes del PDEA-BARMM con el suporta del policia na provincia del Sulu.
El operacion ta descata el continuando esfuerzos del agencias de aplicacion de ley para combate con el actividades de droga ilegal na region. (B. Garcia)