El mga autoridad ya aresta cuatro personas na un operacion contra droga ilegal que ya resulta na desmantelada del un cuarto de droga na Bangsamoro Autonomous Region in Muslim Mindanao (BARMM), asegun con el oficial del Viernes.
Si Gil Cesario Castro, el director del Philippine Drug Enforcement Agency (PDEA) na BARMM, ya identifica con el mga arestao suspechao como canda alias Boyet, 30 años el edad y el mantenedor del cuarto de droga; alias Toto, 43; alias Tahir, 40; y, si alias Musa, 40, todo mga clientes.
Asegun con Castro, con el mga suspechao ya aresta na un operacion de compra busto que ya resulta na desmantelada del cuarto de droga del Miercoles na Purok 7, Barangay Rosary Heights 9, ciudad de Cotabato.
Asegun con Castro, ya confisca na desmantelao cuarto de droga 15 gramos de suspechao shabu enpaquetao na 22 termosellada transparente plastico sobrecitos que tiene el valor de P102,000, dinero de compra busto, varias parafernales de droga, y dos celpons.
Si Castro ya habla, con el cuatro arestao suspechao ya detene en preparacion para el plantada del asunto contra canila por violacion del Ley Integral de Drogas Peligrosas de 2002.
Asegun con Castro, con el operacion contra droga ya conduci el mga agentes del PDEA-BARMM con el suporta del Marine Battalion Landing Team-5, Regional Mobile Force Battalion 14-A, Cotabato City Police Station 2 y otro unidades del policia.
Asegun con Castro, el exitoso operacion ta descata el continuando dedicacion del PDEA para eradica actividades de droga ilegal na ciudad de Cotabato.
El PDEA-BARMM ya apela con el publico para esta vigilante y reporta algun actividades relatao na droga con mga autoridad para fomenta mas segurao comunidades. (B. Garcia)