Ya puede confisca mga autoridad valor de P346,500 contrabando na canto’y aplaya del provincia del Maguindanao del Norte, asegun con el policia del Jueves.
Asegun con el Police Regional Office-Bangsamoro Autonomous Region (PRO-BAR), con el contrabando, compuesto de 22 cajon de cigarillo, ya confisca mga alas 6:35 del Martes denoche na canto’y aplaya na Barangay Simuay, Sultan Mastura, Maguindanao del Norte.
Asegun con el PRO-BAR, enseguidas ya enderesa el mga pulis na canto’y aplaya na Barangay Simuay despues que ya recivi sila informacion desde con un informante cay tiene ta descarga mga cajon de cigarillo na lugar.
Asegun con el policia, 17 del 22 cajon de cigarillo marcao como Cannon y el restante sinco marcao como Ray que tiene el valor de P346,500.
Base na investigacion, el mga cajon de cigarillo estaba na ciudad de Zamboanga y esperansao entrega con un tal Bukakang na Barangay Simuay, Sultan Mastura.
El policia ya ase enbuscada ahora con Bukakang quien enseguidas ya escapa cuando ya gole ele tiene mga pulis ta llega.
Asegun con el PRO-BAR, con el mga confiscao cigarillo ya pone bajo’l custodia del policia na municipio del Sultan Mastura y hay entrega na Buro de Aduana para el propio disposicion. (B. Garcia)
