El mga autoridad ya confisca P508,000 cantidad de contrabando na provincia de Tawi-Tawi, asegun con el Police Regional Office-Bangsamoro Autonomous Region (PRO-BAR) del Miercoles.
Si Police Brigadier General Prexy Tanggawohn, el interino director del PRO-BAR, ya habla el contrabando que ta consisti de 400 saco de arroz de 25 kilos cada uno ya confisca na Barangay Pagasinan, Bongao, el capital del provincia de Tawi-Tawi del Martes.
Asegun con Tanggawohn, el confiscacion del mga smuggled arroz ya vene despues que el mga operativas del policia ya recivi informacion desde con un concierne residente aserca el presencia del camada de saco de arroz na canto’y aplaya del Barangay Pagasinan.
Sin embargo, si Tanggawohn ya habla cay nohay con quien ya aresta siendo nohay ningunos el talla na lugar cuando ya llega el mga pulis na Barangay Pagasinan.
Asegun con Tanggawohn, con el mga confiscao saco de arroz ya lleva para na quartel del policia na municipio del Bongao para el documentacion.
Con el mga confiscao arroz ya entrega na custodia del Buro de Aduana para el propio custodia y disposicion. (B. Garcia)