El mga operativas del Philippine Drug Enforcement Agency na Bangsamoro Autonomous Region in Muslim Mindanao (PDEA-BARMM) ya aresta un elejido oficial de barangay quien listao como un objetivo de alto valor, o high-value target (HVT), y ya confisca P20.4 millones valor de droga ilegal na provincia del Sulu, asegun con el PDEA del Viernes.
Si Gil Cesario Castro, el director del PDEA-BARMM, ya identifica con el arestao suspechao como si Kaber Jailani Yusop, 46, un elejido oficial de barrio y residente del Barangay Lakit, Panamao, Sulu.
Asegun con Castro, con Yusop ya aresta na un operacion de compra busto del Jueves na Barangay Tulay, Jolo, Sulu.
Pero asegun con Castro, el compañero de Yusop, identificao como si Weng Najar, ya puede escapa durante el operacion de compra busto.
“Ta comenda yo con el esfuerzos del mga operativas quien parte del exitoso operacion. Ta agradece yo por el cintuando suporta de diferentes instrumentalidades, unidades de gobierno local, y concierne residentes,” ya habla si Castro.
Si Castro ya habla, ya recubri na posesion del arestao suspechao tres kilos de shabu enpaquetao na tres grande sellado al vacio paquetes plastico con el valor de P20,400,000, dinero de compra busto, dos celpons, un motorciclo, y varias tarjetas de identificacion.
Asegun con Castro, con Yusop ya detene na quartel del policia na Jolo, Sulu, en preparacion para el plantada del caso contra conele por violacion del Ley Integral de Drogas Peligrosas de 2002.
El operacion de compra busto ya conduci el PDEA-BARMM con el suporta del diferente unidades del policia, y National Intelligence Coordinating Agenc na BARMM. (B. Garcia)