El mga autoridad ya confisca na un operacion de aplicacion del ley valor de P2.6 smuggled cigarillo na provincia del Sulu, asegun con el policia del Viernes.
El mga contrabando ya confisca el mga personajes del Sulu Maritime Police Station (Sulu MARPSTA) y otro agencias de enforsadores de ley, en colaboracion con el Buro de Aduana mga alas 9:20 del Miercoles denoche na Barangay Kajatian, Indanan, Sulu.
Asegun con el policia, el operacion dirijido con mga individuales envuelto na ilegal importacion y smuggling de cigarillo, palta propio documentacion, advertencia graficos de salud, y sellos documentales del Buro de Rentas Internas.
El mga operativas ya confisca diferentes clase de cigarillo que tiene el valor de P2,625,000 pero el alegaomente dueño del mga contrabando ya puede escapa.
Asegun con el policia, el dueño del mga cigarillo ta espera con banca de motor para transporta con el mga cigarillo para na otro lugar.
El policia ya conduci el operacion despues que ya recivi sila informacion sobre el transportada del mga contrabando na Barangay Kajarian, Indanan.
Con el mga confiscao cigarillo ya lleva na quartel del Sulu MARPSTA para el propio disposicion. (B. Garcia)