El mga autoridad ya confisca P15.2 millones valor de smuggled cigarillo na un operacion contra contrabando na provincia del Lanao del Norte, asegun con el policia del Viernes.
Asegun con el Lanao del Norte Police Provincial Office (LDNPPO), con el mga smuggled cigarillo ya confisca del Miercoles na Barangay Piraka, Sultan Naga Dimaporo.
Asegun con el LDNPPO, nohay con quien ya aresta siendo ningunos el presente cuando ya confisca el mga autorirdad con el mga cigarillo.
Asegun con el LDNPPO, con el mga smuggled cigarillo ya esconde na casa de un individual mujer y ya puede descubri el mga autoridad cay abierto el ventana del casa.
Asegun con el LDNPPO, el confiscada del mga smuggled cigarillo ya man testigo el mga oficiales del Barangay Piraka.
El LDNPPO ya habla total de 381 cajon de smuggled cigarillo que tiene el valor de P15,240,000 el ya confisca na casa.
Asegun con el policia, el dueño del mga smuggled cigarillo conocido como si un tal Al y con el contrabando ya entrega con un tal Bayan y un desconocido compañero, ambos mga residentes de Barangay Piraka, Sultan Naga Dimaporo.
Con el mga confiscao smuggled cigarillo ya pone bajo’l custodia del policia na municipio del Sultan Naga Dimaporo para mas del documentacion y hay entrega na Buro de Aduana para el propio disposicion. (B. Garcia)