El mga autoridad ya confisca P13.2 millon valor de smuggled cigarillo y ya aresta dos personas na separao campaña contra smuggling na Zamboanga Peninsula y na Bangsamoro Autonomous Region in Muslim Mindanao (BARMM).
Na total valor del confiscao smuggled cigarillo, con el mas de P2.5 millon ya confisca aqui na ciudad de Zamboanga y con el resto de P10.6 millon alla na Sitio Smart, Barangay Kajatian, Indanan, Sulu.
Asegun con Police Brigadier General Bowenn Joey Masauding, el director del mando regional del policia or PRO-9, con el P2.5 millon valor de smuggled cigarillo ya confisca na un checkpoint del policia y Buro de Aduana mga alas 4:45 del Domingo tarde na Sitio Salum, Barangay San Roque, ciudad de Zamboanga.
Nohay mas nombra si Masauding con el arestao chufer del trak que ta transporta con el mga smuggled cigarillo.
Si Masauding ya habla, con el chufer del trak ya pone bajo’l custodia del policia local mientras con el confiscao cigarillo ya engrega na Buro de Aduana.
Mientras tanto, el policia en coordinacion con el Buro de Aduana y gobierno local del municipio de Indanan, ya descubri un bodega que ya resulta na confiscacion del P10.6 millon smuggled cigarillo del Viernes na Sitio Smart, Barnagay Kajatian, Indanan.
Asegun con el Police Regional Office-Bangsamoro Autonomous Region (PRO-BAR), el mga autoridad ya puede aresta con un tal Jim, quien sorpresao na llegada del mga pulis na bodega del mga cigarillo.
Pero, asegun con el PRO-BAR, el mga compañeros de Jim ya puede escapa cay ya gole sila el llegada del mga autoridad.
El PRO-BAR ya habla, con el mga confiscao smuggled cigarillo ya entrega na Buro de Aduana para el propio disposicion. (B. Garcia)