Tres personas, incluido un nars, el ya aresta cuando ya bungca un cuarto de droga ilegal na un operacion de aplicacion de ley na provincia del Zamboanga del Sur, asegun con el Philippine Drug Enforcement Agency (PDEA) del Sabado.
Si Maharani Gadaoni-Tosoc, el director regional del PDEA, ya nombra con el mga arestao suspechao como el siguientes: Jerick Tamayo Carlito, 33 años el edad, el mantenedor del cuarto de droga y el objetivo del operacion de aplicacion de ley; Geric Amondina Tirasol, 34, un nars; y si Rohan Kali Mohammad, 20, un fescador.
Asegun con Gadaoni-Tosoc, con el tres suspechao ya aresta cuando na bungca un cuarto de droga el mga operativas del PDEA y policia durante el operacion de aplicacion de ley por medio de implementar un orden de buscada mga alas 8:45 del Jueves denoche na Purok Camias, Barangay Poblacion, Margosatubig, Zamboanga del Sur.
Asegun con Gadaoni-Tosoc, ya recubri na bungcao cuarto de droga siete gramos de suspechao shabu que tiene el valor de P47,600 y diferentes clase de parafernales de droga ilegal.
Si Gadaoni-Tosoc ya habla, hay planta caso por violacion del Secciones 6, 7, 11, 12, y 15, Articulo II del Ley de Republica 9165 contra con el mga arestao suspechao.
El Ley de Republica 9165 mas conocido como el Ley Integral de Drogas Peligrosas de 2002 o el Comprehensive Dangerous Drugs Act of 2002. (B. Garcia)