Un notorioso armero el ya aresta el mga autoridad na un operacion de aplicacion de ley na provincia del Zamboanga Sibugay, asegun con el policia del Sabado.
Si Police Brigadier General Bowenn Joey Masauding, el director del mando regional del policia o Police Regional Office-9 (PRO-9), ya nombra lang con el arestao notorioso armero como si alias Dan, un activo miembro del the Moro National Liberation Front.
Asegun con Masauding, con Dan ya aresta na un operacion de aplicacion de ley por medio de servi’r un orden de buscada mga alas 8 del Jueves denoche na Purok 3, Barangay Bella, Alicia, Zamboanga Sibugay.
Si Masauding ya habla, ya recubri na posesion de Dan el mga siguientes: siete shotgun de 12 balina echo en casa con mga bala; un rifle M-14 con 20 bala; un calibre .380 pistola con siete bala; tres calibre.22 revolvers; one calibre .38 revolver; two calibre .22 rifles, diferentes clase de bala; partes de pusil; y diferentes clase de arimienta que ta usa para compone, produci, y fabrica armas de fuego.
Asegun con Masauding, con Dan ya pone bajo’l custodia del policia na municipio del Alicia, Zamboanga Sibugay, para el documentacion y propio disposicion.
“El aresto de alias Dan es parte lang del de amon mga esfuerzo para privini incidente de tiroteo y violencia de pusil na Zamboanga Peninsula. Hinde came ay descansa hasta hay confisca todo’l armas sin licensia y aresta con todo’l mga poco escrupuloso individual,” si Masauding ya habla.
Asegun con Masauding, con Dan ay planta el asunto por violacion del Ley de Republica 10591 o mas conocido como el Comprehensive Firearms and Ammunitions Regulation Act. (B. Garcia)