Un miliciano listao como uno del mga personas mas buscada na region ya aresta el mga autoridad na un operacion de aplicacion de ley na provincia del Zamboanga Sibugay, asegun con el policia del Miercoles.
Si Police Brigadier General Bowenn Joey Masauding, el director del mando regional del policia o Police Regional Office-9 (PRO-9), ya nombra con el arestao miliciano como si Alex Dinopol, 47 años el edad, quien listao como el numero 10 persona mas buscana na region.
Asegun con Masauding, con Dinopol ya aresta el combinao operativas del policia y militar mga alas 11 del Domingo denoche na Purok Campo 4, Barangay Goodyear, Kabasalan, Zamboanga Sibugay.
Si Masauding ya habla, si Dinopol tiene pendiente orden de aresto por el crimen de robo con P200,000 recomendao piansa que ya dale el un corte na Ipil, el capital del provincial de Zamboanga Sibugay.
Si Masauding ya habla con Dinopol ya pone bajo’l custodia del policia na municipio del Kabasalan para el propio documnetacion.
Si Masauding ya comenda con el operativas del policia y militar por el exitoso aresto de Dinopol, uno del mga personas mas buscada na Zamboanga Peninsula. (B. Garcia)