Un jinete el ya aresta y valor de P544,000 droga ilegal el ya confisca el mga autoridad na Bangsamoro Autonomous Region in Muslim Mindanao (BARMM), asegun con el policia del Viernes.
El Police Regional Office-Bangsamoro Autonomous Region (PRO-BAR) ya nombra lang con el arestao jinete como si alias Jam.
Asegun con el PRO-BAR, con Jam ya aresta el combinao personajes del policia y militar na Barangay Tampilong, ciudad del Marawi, Lanao del Sur del Jueves.
Asegun con el PRO-BAR, el combinao personajes del policia y militar ya hace para con un motorciclo ta maneja si Jim despues que ya nota sila ya precura le evita con el checkpoint que ta conduci sila aquel tiempo.
Asegun con el policia, el mga pulis y soldao ya descubri ta transporta droga ilegal si Jam cuando ya abre el suspechao con el compatimiento del su motorciclo para presenta mga documentos del vehiculo que ya pidi sila que presenta canila.
Asegun con el policia, ya recubri na posesion de Jam 80 gramos de suspechao shabu enpaquetao na sinco termosallada transparente sobrecitos plastico que tiene el valor de P544,000.
Asegun con el policia, con Jam ya detene na quartel del policia na ciudad de Marawi en preparacion para el plantada del caso contra conele por violacion del Ley Integral de Drogas Peligrosas de 2002.
Con el mga evidencia ya confisca na posesion de Jam ya entrega na Provincial Forensic Unit para el examinacion na laboratorio.
Asegun con Police Brigadier General Prexy Tanggawohn, el interino director del PRO-BAR, el acomplicimiento ta servi como un recordatorio con el publico aserca del esfuerzos diligente del mga autoridad para sustene el paz y orden.
Si Tanggawohn ya habla, el acomplicimiento ta dale tamen mira el de ila loyalidad na reglamento del ley y proteje con el mga vida na comunidades desde’l amenaso por el actividades criminal. (B. Garcia)