Un maestra y cinco otro personas, incluido un menor de edad, el ya aresta y ya confisca valor de P3.4 millones droga ilegal na un operacion contra droga na provincia del Lanao del Sur, asegun con el Philippine Drug Enforcement Agency (PDEA) del Domingo.
Si Gil Cesario Castro, el director de PDEA na Bangsamoro Autonomous Region in Muslim Mindanao (PDEA-BARMM), ya identifica con el arestao maestra como si Fatima Pangcoga Oranggaga, 42 años el edad; Hania Alcantara Delinogun, 57; Esmael Antal Mamarinta, 27; Alfatah P. Oranggaga, 20; y si Juhaifa Pangcoga Oranggaga, de legal el edad.
Si Castro nohay identifica con el arestao menor de edad quien un moher.
Asegun con Castro, con el maestra y su mga cohortes ya aresta na un operacion de compra busto del Viernes na Barangay Rapasun, ciudad de Marawi, Lanao del Sur.
Durante el operacion de compra busto, asegun con Castro, ya confisca na posesion del mga arestao suspechao 500 gramos de suspechao shabu enpaquetao na cinco paquetes plastico que tiene el valor de P3.4 millones, dinero de compra busto, cinco celpons, varias tarjetas de identificacion, y un vehiculo que ta cre mga autoridad ta usa sila na de ila comercio de droga ilegal.
Si Castro ya habla, con el mga suspechao ya detene na carcel del PDEA en preparacion para el plantada del caso contra canila por violacion del Ley Integral de Drogas Peligrosas de 2002.
Con el arestao menor de edad ya entrega na custodia del Departamento de Bienestar Social y Desarollo para el propio disposicion.
Asegun con Castro, el mga operativas del PDEA-BARMM ya conduci el operacion de compra busto contra con el mga arestao suspechao con el suporta del diferente unidades del policia, y Departamento de Servicio de Seguridad de un Universidad na ciudad de Marawi. (B. Garcia)