El mga autoridad ya aresta sinco personas y ya confisca mga droga ilegal y armas de fuego na un operacion de aplicacion de ley na provincia del Zamboanga Sibugay, asegun con el policia del Domingo.
El mando regional del policia o el Police Regional Office-9 (PRO-9) nohay mas identifica con el sinco arestao suspechao puera lang de hablar cay uno de ila clasificao como un individual de alto valor.
Asegun con el policia, con el mga suspechao ya aresta na un operacion de aplicacion de ley por medio de implementada de un orden de enbuscada mga alas 5:45 del Sabado aga na Purok Higad, Barangay Maolboal, Talusan, Zamboanga Sibugay.
Asegun con el policia, ya confisca na posesion del mga suspechao P74,120 valor de droga ilegal, P28,760 dinero, un calibre .45 pistola, un .9-milimetro pistol, y un calibre .38 revolver con mga bala.
Ya recubri tamen na posesion del mga suspechao un cuchillo plegable, tres anillo de oro, tres cadenita de oro, tres celpon, dos bolso bandolera, tres bolo, y otros pa mga cosas.
El mga aresta suspechao y el mga confisca elementos ya pone bajo’l custodia del policia na municipio del Talusan para el propio disposicion.
El orden de enbuscada que ya servi el combinao grupo del policia y militar ya dale el un corte na Imelda, Zamboanga Sibugay, del Julio 18, 2024. (B. Garcia)