Tres suspechao el ya aresta mientras valor de P13.6 millon droga ilegal el ya confisca na separao operacion contra droga na mga provincias de Zamboanga Sibugay y Zamboanga del Sur, asegun con el Philippine Drug Enforcement Agency (PDEA) del Jueves.
El oficina regional del PDEA ya identifica con el mga arestao suspechao como canda Ibnorasa Sarapuddin, 24 años el edad, Raden Dammang, 21, y si Kausar Tapsi, 56.
Maharani Gadaoni-Tosoc, el PDEA-Zamboanga Peninsula director, ya habla cay canda Sarapuddin y Dammang ya aresta na un operacion del compra busto maga ala 1:20 del Miercoles aga na Barangay Poblacion, Ipil, Zamboanga Sibugay.
Si Gadaoni-Tosoc ya habla, ya confisca desde canda Sarapuddin y Dammang un kilo del suspechao shabu con el cantidad de P6.8 millon, mga balutan de dinero boodle que ya usa como dinero de compra busto, un celpon, tarjetas de identificacion, recivo, portamoneda, bolso bandolera, y otros pa.
Si Gadaoni-Tosoc ya habla, con Tapsi ya aresta na otro operacion de compra busto mga alas 9:20 del Martes denoche na Purok Masigla, Barangay Poblacion, Ipil, Zamboanga Sibugay.
Asegun con Gadaoni-Tosoc, ya confisca na posesion de Tapsi un kilo de suspechao shabu con el valor de P6.8 millon, balutan de dinero boodle, un celpon, mga relo, pulseras, aretess, broche, mga portamoneda, bolso bandolera, tarjetas de identificacion, diferentes clase de recivo, y P1,122.50 dinero.
Asegun con Gadaoni-Tosoc, con el mga arestao suspechao hay planta el asunto por violacion del Secciones 5 y 11, Articulo II del Ley de Republica 9165 o mas conocido como el Ley Integral de Drogas Peligrosas de 2002.
Si Gadaoni-Tosoc ya habla, el separao operaciones contra droga ya conduci el PDEA con el suporta del policia y militar na mga provincias del Zamboanga del Sur y Zamboanga Sibugay. (B. Garcia)