Dos individuales de alto valor, o HVI, el ya aresta y ya confisca mas de P1 millon valor de droga ilegal el mga autoridad na un operacion contra droga na ciudad de Zamboanga, asegun con el policia del Lunes.
El policia nohay nombra con el dos arestao suspechao quien ambos mga hombre y el uno tiene el edad de 22 años y residente de Barangay Kasanyangan, y el otro tiene el edad de 48 residente de Barangay Mercedes.
Asegun con el policia, con el dos suspechao ya aresta na un operacion de compra busto mga alas 9:24 del Viernes na un motel na Barangay Guiwan, ciudad de Zamboanga.
Asegun con el policia, ya confisca na posesion del dos arestao suspechao aproximadamente 155 gramos de suspechao shabu que tiene el valor de P1,054,000.
Con el dos suspechao ya aresta el combinao grupo de operativas del Zamboanga City Police Station 5 y del oficina regional del Philippine Drug Enforcement Agency.
Asegun con el policia, ya detene con el dos arestao suspechao en preparacion para el plantada de caso contra canila por violacion del Ley Integral de Drogas Peligrosas de 2002. (B. Garcia)