Un persona listao como un Street Level Individual (SLI) el ya aresta y ya confisca valor de P139,000 droga ilegal el mga autoridad na un campaña contra droga na ciudad de General Santos, asegun con el Area Police Command-Western Mindanao (APC-WM) del Miercoles.
Asegun con el APC-WM, con el arestao SLI suspechao ya nombra lang el Police Regional Office-12 como un tal Ada,49 años el edad, y un self-employed persona.
Asegun con el APC-WM, con Ada ya aresta na un operacion de compra busto na Barangay Sinawal, ciudad de General Santos del Martes.
Ya puede confisca na posesion de Ada 20.56 gramos de suspechao shabu enpaquetao na 27 sobrecitos plastico con el valor de P139,808, un celpon, y un P1,000 markao dinero, asegun con el APC-WM.
Con Ada y el mga confiscao evidencia ya pone bajo’l custodia del Police Station 2 del General Santos City Police Office para el propio disposicion.
Asegun con el policia, hay planta asunto contra co Ada por violacion del Ley de Republica Numero 9165 o mas conocido como el Comprehensive Dangerous Drugs Act of 2002.
“Ta esta came comitido para eradica con el comercio de droga ilegal y hay implementa estricto medidas para pone na carcel con todo personas envuelto na vendida y usada de sustancia ilegal,” si Police Brigadier General Percival Augustus Placer, el director del PRO-12, ya habla na un mensaje.
“Hay asegura came cay protejido el mga vivientes y ta vivi un pacifico vida,” si Placer ya habla. (B. Garcia)