Un suspechao lider de grupo criminal el ya aresta el mga autoridad na un operacion de aplicacion de ley aqui na ciudad de Zamboanga, asegun con el Criminal Investigation and Detection Group-9 (CIDG-9) del Martes.
Si Police Lieutenant Colonel Jynleo Bautista, el oficial-en-cargao del CIDG-9, ya identifica con el arestao suspechao como si Mike Ebol alias Mickey, 24 años el edad, un transgenero y el alegao lider del grupo criminal Warla.
Asegun con Bautista, con Ebol ya aresta na su residencia durante un operacion de aplicacion de ley por medio de servi’r orden de aresto na Barangay Tetuan, en este ciudad.
Asegun con Bautista, si Ebol tiene pendiente orden de aresto sin recomendao piansa por el crimen de secuestro para pedir rescate y detencion illegal (kidnapping for ransom and illegal detention) que ya dale el un corte na ciudad de Parañaque, del Octubre 3, 2023.
Si Bautista ya habla, el grupo criminal Warla, ta opera na Luzon ta hace victima mga estrangero por medio de Dating Apps.
Si Bautista ya habla, el grupo criminal Warla envuelto na secuestro de Michael Lee, un negociante Taiwanese del Septiembre 3, 2022 na ciudad de Parañaque. Con Lee ya rescatada o ya salva del Septiembre 7 del mismo año.
Mientras tanto, si Ebol ya nega el acusasion contra conele.
Asegun con Ebol, hinde ele el lider o miembro de grupo criminal Warla.
Con Ebol ya pone bajo’l custodia del CIDG-9 para el propio disposion.
Asegun con Baustista, con Ebol ya aresta el combinao grupo del CIDG y Special Action Force. (B. Garcia)