Ya planta ya asunto de criminal na Oficina del Fiscaliya del ciudad encontra con el tres suspechao na matansa del un jovencita estudiante aqui na ciudad de Zamboanga.
Asegun con Police Colonel Alexander Lorenzo, el Zamboanga City Police Office (ZCPO) director, cay el asunto de matansa (murder) ya somete na fiscalia mga alas 5 del tarde del Domingo encontra con con Nickson Saavedra, y su dos uban, incluwido un menor de edad.
El tres amo el suspechao na matansa del un 17 años estudianta na Barangay Pasobolong, este ciudad.
Con el estudianta ya encontra muerto na buugan na Zone 3, Barangay Pasobolong mga del Hulyo 26 despues de 24 horas ya desaparese el victima.
Base na resulta del eksaminacion, con el jovencita estudianta ya mata por media de asercuga.
Asegun con Lorenzo cay si Saavedra ta esta pa na custodiya del Zamboanga City Police Station 4 (ZCPS4) na Barangay Culianan myentras con el menor de edad ya entrega ya na facilidad de “Child in Conflict with the Law (CICL) del Department of Social Welfare and Development (DSWD).
Con Saavedra ya aresta mga pulis del Hulyo 27 na Zone 4, Barangay Pasobolong, este ciudad.
El Pulisiya ta ase envuscada con el terser suspechao quien ta esta libre hasta este mga tiempo. Nohay nombra el pulisiya si quine el terser suspechao. (B. Garcia, photo Courtesy of ZCPS4)