El autoridad ya planta ya asunto criminal na fiscalia contra con cuatro personas, incluido un oficial de barangay, quien alegaomente responsable na muerte de un candidato y irida del su esposa y anak na Lanao del Sur, el policia ya habla del Domingo.
Asegun con Police Colonel Robert Daculan, el Lanao del Sur police director, el asunto de matansa y “frustrated murder” ya planta del Octubre 25 contra con Pabil Pagranan y con su esposa, si Normalah, y otro dos suspechao, canda Tomy Esmail y Marof Esmail.
Asegun con Daculan si Normalah amo el presente barrio capitana del Barangay Sigayan, Kapatagan, Lanao del Sur.
Si Daculan ya habla cay el mga acusao responsable na un incidente de emboscada o “ambush” que ya resulta na muerte del Kamar Bansil mga alas seis del aga del Octubre 25 na Barangay Sigayan.
Durante el incidente, ya iri el esposa de Bansil, si Asmas, y el de ila anak hombre. Ambos el esposa y el anak admitido na hospital.
Si Bansil, un independiente candidato para barrio capitan na Barangay Sigayan.
Bien popular si Bansil com mga residentes de Barangay Sigayan maskin un independiente candidato ele.
Ta maneja su vehiculo si Bansil y ta sigi hunto conele su esposa y anak cuando ya man ambush canila el mga suspechao. (B. Garcia)