El mga autoridad ya recubri armas de fuego de alta calibre y droga ilegal con un persona mas buscada que ya aresta sila na provincia del Lanao del Sur, asegun con el policia del Lunes.
Si Police Colonel Robert Daculan, el director del policia na Lanao del Sur, ya nombra lang con el arestao persona mas buscada como si Alias Keding.
Asegun con Daculan, con Keding ya aresta mga alas 4:10 del Sabado tarde na Barangay Campong Inudaran, Marantao, Lanao del Sur.
Si Daculan ya habla, si Keding tiene pendiente orden de aresto sin recomendao piansa por el crimen de matansa y listao como el numero dos persona mas buscada na municipio de Marantao.
Asegun con Daculan, ya recubri na posesion de Keding un rifle Uzi con mga bala, 1.5 gramos de suspechao shabu enpaquetao na tres termosellada transparente sobrecitos plastico que tiene el valor de P10,200.
Asegun con Daculan, ta prepara sila el necesario documentos para planta caso contra con Keding por ilegal posesion de armas de fuego y por violacion del Ley integral de drogas peligrosas de 2002.
Si Daculan ya habla, conj Keding ya pone bajo’l custodia de policia na municipio del Marantao. (B. Garcia)