El mga autoridad ya aresta con el suspechao cabesa pensante na abduccion del Americano blogger, Elliot Eastman, na provincia del Zamboanga del Norte, asegun con el policia de Jueves.
Si Tiniente Coronel Ramoncelio Sawan, el interino portavoz del mando regional del policia, ya identifica con el arestao suspecha como si Jackaria Jamani, 35 años el edad y residente de Sibuco, Zamboanga del Norte.
Si Sawan ya habla, con Jamani ya aresta abordo na un barco de pasajero na mar del Basilan mga alas 5:30 del Martes tarde el mga operativas del policia con el suporta tactical ya proporciona el 55th Special Forces Company del PNP-Special Action Force.
Si Sawan ya habla, con Jamani ya aresta base na virtud del un orden de aresto por el crimen de secuestro y grabe detencion ilegal que ya dale el un corte na Siocon, Zamboanga del Norte, del Deciembre 25, 2024.
Si Jamani alegaomente un suportador del grupo de Abu Sayyaf. Ya pone conele bajo’l custodia del policia an municipio de Sibuco para el propio disposicion.
Con Eastman ya abducta el cuatro armao personas desde su residencia del noche del Octobre 17, 2024 na canto’y aplaya del Barangay Poblacion, Sibuco, Zamboanga del Norte.
Uno del mga suspechao ya tira con Eastman cuando ya resisti le mientra ta jala conele para na un banca de motor para transporta conele na provincial de Basilan.
El mga autoridad ya confirma de Deciembre 5, 2024, cay ya muri si Eastman durante el noche que ya abudcta conele y con el su resto ya buta na mar.
Si Eastman, quien un nativo of Vermont, Estados Unidos, ta queda ya dentro de sinco meses hunto con su esposa, quien un residente de Sibuco, cuando ya abducta conele. (B. Garcia)