El Alcalde John Dalipe ya condena na de todo posible mafueza palabra con el acto de violencia que ya comete mga desconosidos personas con un 19 años estudianta de un universidad na ciudad del Lunes.
El condenacion de Dalipe ya vene despues que tiene tres desconocidos personas el ya abducta con un estudianta del Lunes medio dia na vicinidad del Paseo de Teresita, Barangay San Roque, en este ciudad.
“Hinde yo tolera cualquier acto de aggression y violencia contra con el de aton mga vivientes,” si Dalipe ya habla como un contestacion con el incidente.
Asegun con Dalipe, ya diriji ya le con el Zamboanga City Police Office (ZCPO) que ta encabesa si Police Colonel Kimberly Molitas para conduci exhaustivo y rapido investigacion del incidente, y imedietamente lleva ante del justicia con el mga perpetradores.
“Nunca yo tolera acto de violencia contra mujeres. Nohay lugar aqui na ciudad de Zamboanga el violencia contra mujeres,” si Dalipe ya habla.
Con el victima que ya conoce lang como un tal Joan ya puede salva mga operativas del policia local del mga alas 9:35 del Lunes denoche na Sitio Malandi, Barangay Patalon, en este ciudad.
El ZCPO ta continua del ila investigacion para establisa y aresta con el mga suspechao del incidente. (B. Garcia)
