Pasada alas onse del anoche, un accidente vehicular el ya transpiri na Veterans Avenue, adelante del sementeryo de chino donde invuelto el un Yamaha Mio y un Suzuki Raider.
Base na report del ZCPS 11, el Yamaha Mio con MV File no. 0901-230267 ta maneha asegun si Rickson Dondoyano, veinte otso años el edad, sultero y residente de Murga Street, Veterans Avenue Barangay Sta. Catalina mientras el Suzuki Raider con numero de placa 200-JXT ta maneha si Almiradz Samad Isnain, deci-siete años el edad, sultero con back rider identificao como si Shirhadz Aradji Mawali, deci-siete años el edad, sultero y equalmente residente de Lustre, Sta. Catalina en este ciudad.
Base na initial report del ZCPS 11, el Yamaha Mio asegun ta core estaba na weste para iste na Governor Alvarez Street y cuando ya llega na intersection del Veterans Avenue y Don Alfaro Street ya man right turn el tsuper para na Sur (South), asegun opuesto linya este rason para man bangga el vehiculo na Suzuki Raider quien asegun ta traveza estaba na Sur para Norte del mencionao lugar.
Equalmente el dos tsuper y el un back ride ya sustene visible maga irida na diperentes parte del cuerpo. Con estos ya lleva na ZCMC por el curada medikal mientras el maga vehiculo invuelto ya lleva na ZCPS11 por el propio desposicion. (Erica Javier)