Nueve miembros del “Abu Sayyaf Group (ASG)” el ya rindi na mga autoridad despues que ya realisa sila cay nohay mas significancia de ila existencia siendo declarao ya el provincia de Sulu librao desde’l influencia del ASG, el militar ya reporta del Domingo
Asegun con Brigadier General Giovanni Franza, el comandante del 1102nd Infantry Brigade, el nueve miembros del ASG ya rindi con el de suyu personajes del otro semana na municipio de Luuk, Sulu.
Asegun con Franza, aquellos quien ya rindi ya entrega mga armas de fuego de alta calibre compuesto de sinco riple Garand, dos Armalite, un improvisado calibre .50 riple de sniper y un riple KG9.
Si Franza ya habla cay ya rindi el nueve miembros del ASG cay ta desea sila vivi pacifico vida hunto con el de ila cada’y cual familia.
Si Franza ya presenta con el nueve miembros de ASG quien ya rindi y de ila mga armas con Major General Ignatius Patrimonio, comandante del 11th Infantry Division (ID) commander, na quartel del 1102nd Infantry Brigade na Barangay Tandu Bato, Luuk, Sulu.
Uno del nueve que ya rindi, un mujer conosido como si Doctora Narzun, 61 años, quien por un decada ya miembro del ASG y ta ayuda le con mga suguidores del ASG quien ya iri na tirahan contra con mga soldao.
Si Narzun ya habla cay ta rindi le su gratitud con maga soldao y con el govierno por el ayuda canila y ta logra le ahora el paz y libre ya sila vivi hunto con el de ila familiares.
El nueve miembros del ASG quien ya rindi ya recivi ayuda con el Ministry of Social Welfare and Development na region autonomo.
Cada uno de ila ya recivi paquete de comida, un saco de 25 kilos arroz y otros pa mga productos de groceriya. (B. Garcia, photo courtesy of 1102nd Infantry Brigade)