El fuersa militar ya anuncia cay siete sigidores del grupo Abu Sayyaf ya rindi con maga autoridad na provincia de Sulu.
Asegun con Major General Ignatius Patrimonio, comandante del Joint Task Force (JTF)-Sulu, el rindida del siete sigidores del Abu Sayyaf del Biyernes ya ase posible na esfuerso del maga secreta del 1102nd Infantry Brigade.
Nohay nombra si Patrimonio con el siete sigidores del Abu Sayyaf quien ya rindi fuera lang que ya entrega sila siete armas de different calibre.
El maga armas ta incluwi in ripple armalite, dos carbine, tres garand y uno calibre treynta’y ocho revolver.
Con el siete sigidores del Abu Sayyaf ya presenta con Brigadier General Giovani Franza, comandante del 1102nd Infantry Brigade, despues que ya rindi sila.
Asegun canila ya decidi sila rindi cay cansao ya sila de istindi y esconde desde con el tropa del military y nohay mas fuersa el grupo del Abu Sayyaf.
Desde Enero este año, tiene el suma total de siento setenta’y cuatro lideres y sigidores del grupo Abu Sayyaf el ya rindi con maga autoridad na provincia de Sulu.
Siento treynta’y seis del siento setenta’y cuatro amo maga regular sigidores y el treynta’y ocho amo maga ayudante del grupo.
Myentrastanto, Si Brigadier General Arturo Rojas, el acting commander del Western Mindanao Command, ya asegura cay ay continua sila trabaja para manda rindi con maga restante sigidores del grupo Abu Sayyaf quien ta esta pa na monte, ta tene miedo y confundido na de ila vida. (B. Garcia, photo courtesy of Joint Task Force-Sulu)