Siete miembros de mal elementos del sociedad el ya muri mientras un soldao el ya iri na un tirahan na vicinidad de un isla na provincia del Maguindanao del Norte, asegun con el militar del Lunes.
Asegun con Tiniente General William Gonzales, el comandante del Western Mindanao Command (Westmincom), el tirahan ya ocuri mga ala 1:56 del Viernes tarde na mar del Isla del Bongo, municipio de Parang, provincia de Maguindanao del Norte.
Asegun con Gonzales, el siete muerto miembros del mal elementos del sociedad mga siguidores de un tal Commander Paradise.
Asegun con Gonzales, el tirahan ya ocuri cuando el mga tropas de marino ya columbra con el mga mal elementos del sociedad abordo na 12 banca de motor mientras ta conduci sila patrulla de seguridad maritima en coordinacion con el policia.
Asegun con Gonzales, el mga tropas ya recubri con el resto del tres del siete muerto del mal elementos del sociedad, de quien mga identificacion debe pa chekya y asegura.
Si Gonzales ya habla, el mga operativas ya recubri tamen un armas de fuego de alta calibre y mga capsula del 7.62 milimetros rifle.
Asegun con Gonzales, con el irido soldao ya lleba na hospital del Campo Siongco na Barangay Awang, Datu Odin Sinsuat, Maguindao del Norte.
Si Gonzales ya habla, el mga soldao ta continua hace enbuscada con el losdemas miembros del mal elementos del Sociedad quien ya escapa. (B. Garcia)