El 6th Infantry “Kampilan” Division (6ID) ya honra con 14 tropas de Kampilan por el de ila exemplario contributiones na mission del 6ID, asegun con el militar del Martes.
Si Major General Antonio Nafarrete, el comandante del 6ID, ya encabesa con el simple ceremonia cuando ya extende honor con el 14 tropas de Kampilan del Lunes na Campo Siongco na Barangay Awang, Datu Odin Sinsuat, Maguindanao del Norte.
Asegun con el 6ID, si First Lieutenant Rhoben Suva ya recivi el prestigioso Medalla Cruz de Plata por su critical papel convinci con un miembro del grupo de terorista local para rendi y reintegra na sociedad.
El Medalla al Merito Militar ya premia canda Technical Sergeant Cris Rellon, Staff Sergeant (SSg) Jessie Ann Deocades, SSg Darryl Winston Jugador, SSg Rique Malaque, SSg Elbert Pito, SSg Erwin Prado, Sergeant (Sgt) Sheldon Habel, Sgt Rolly Forro, Corporal Florentino Tongcua, Private First Class Jomar Dulay y Private Jimar Casibua reconociento con el de ila dedicacion durante el 37 aniversario de fundacion del 6ID.
Ya honra tamen canda SSg Ireneo Bahian y Sgt Julito Macalua por adquerir el de todo alto posible puntos de 100 por ciento na todo eventos de prueba de aptitud fisica durante el capacitación del sistema de reenganche reestructurado para del Clases de 332 y 333.
Si Colonel Edgar Catu, el jefe de estado mayor del 6ID, ya acompania con Nafarrete durante el ceremonia de premiacion. (B. Garcia)