El mga tropas del 55th Infantry Battalion (55IB) ya lleva bolbe y formalmente ya entrega con el mga resto del tres muerto rebelde New People’s Army (NPA) na de ila respetivo familias na Norte Mindanao, asegun con el militar del Lunes.
Asegun con Tiniente Coronel Anthony Caro, comandante del 55IB, con el mga resto ya entrega con el de ila respetivo familias del otro semana na mga provincias del Agusan del Norte y Bukidnon.
El tres mueto rebelde NPA identificao como canda Rochie Singaman, un residente de Impasog-ong, Bukidnon; Wendy Luis, del Cabanglasan, Bukidnon; y, Hernan Guinalang, del Buenavista, Agusan del Norte.
Asegun con Caro, el tres muerto rebelde NPA amo mga siguidores del Sub-Regional Committee 5, North Central Mindanao Regional Committee (SRC5-NCMRC).
Ya muri sila siguiendo el 15-minuto tirahan contra con el mga tropas del 55IB del Octubre 5 na zona del interior na Sitio Bagong Silang, Barangay Malna, Kapai, Lanao del Sur.
Asegun con Caro, el tirahan ya socede cuando ya conduci operacion de combate el mga tropas del 55IB despues de informacion desde con mga concierne residentes sobre el presencia del mga rebelde NPA quien ta conduci actividades de extorcion na Sitio Bagong Silan, Barangay Malna.
El mga tropas ya recubri con el resto del tres NPA que ya abandona de ila mga uban cuando ya istindi sila. Ya recubri tamen mga tropas cuatro armas de fuego de alta calibre.
Si Caro ya expresa su profundo condolencias con mga triste families del mga muerto rebelde NPA quien ya queda victima de equivocao ideologia del comunista.
Si Caro ya reitera su apelo con el mga restante miembros de NPA para rindi y vive un pacifico vida. (B. Garcia)